CARBALLEIRA DE A MADALENA, O PINO



Esta Carballeira é unha espectacular masa de Carballos ( Quercus  robur) de gran porte, composta de árbores de media idade, que ocupa unha superficie de 6.299 metros cadrados aproximadamente. A altura dominante destes está entre os 15 e os 20 metros  aprox. e o diámetro medio é de 40 centímetros  aprox.




 Recibiranos un precioso CRUCEIRO realizado en granito. Na base conserva unha inscrición que sinala: “doado pola familia Calvo Vázquez- ano 1978”. 


Na metade do fuste leva unha figura feminina, apoiada nunha peana, cun crucifixo nos brazos, que algúns sinalan como a representación da imaxe de Santa Rita. Aínda que polo pelo, longo e solto, inclinaríame a sinalar que podese tratar de Madalena penitente.


Chama tamén a atención, o capitel con anxos alados nas esquinas. 



Presenta unha cruz coa imaxe de Cristo crucificado na parte anterior e imaxe da Virxe do Rosario na posterior. 



Tras este sitúase unha sinxela CAPELA de planta rectangular, da que destaca a espadana do campanario de gusto barroco-rural tradicional.


 Nun dos laterais da capela hai unha FONTE da que mana auga por dous canos. 



Tras esta, un monólito cunha imaxe feminina de cabelos longos e un crucifixo coa figura de cristo nas súas mans, moi parecida á vista no fuste do cruceiro.



Esta carballeira é o lugar de celebración dunha das romarías máis concorridas e veneradas no Concello do Pino: a ROMARÍA DA MADALENA que se celebra o 22 de xullo.




Baixo o tupido arborizado autóctono e aproveitando o paso do Rego de Carballas, habilitouse unha preciosa ÁREA RECREATIVA, dotada de mesas, bancos e palco.



Ademais formouse unha pequena LAGOA, na que ten lugar o concurso anual de pesca infantil. 




Sen dúbida, un apracible lugar onde pasear e gozar dun día ao aire libre.




De camiño a este enclave, detivémonos no lugar de  Vilarrel a contemplar outra curiosa FONTE.



Coordenadas da Carballeira: 42º56’02.2”N 8º24’47.1”W

INFORMACIÓN RECOLLIDA DAS SEGUIENTES LIGAZÓNS







VISITA OUTROS SORPRENDENTES LUGARES DO MUNICIPIO DE O PINO NESTA LIGAZÓN, CUN MAPA PARA CHEGAR A CADA UN DELES.