GALICIA PUEBLO A PUEBLO: PETRÓGLIFOS DE LAMAFORCADA, NOGUEIRA DE RAMUÍN

Os petróglifos localizados en Lamaforcada, e outros moitos esparexidos polo municipio, amosan a arte rupestre propia da Idade do Bronce (1.800 – 700 a.C).

Coñécense por petróglifos (pedras gravadas), aquelas rocas que se atopan ao aire libre e que foron talladas, ben por raspado, piqueteado ou martillado, por habitantes de distintas épocas, sendo aínda unha incógnita o significado de moitos destes símbolos, coñecidos como insculturas.

As representacións máis antigas e abundantes nos petróglifos galegos son as denominadas 'coviñas' ou cazoletas, os círculos e as combinacións circulares, progresando no tempo con figuras zoomorfas, antropomorfas, labirintos, abstractos, cadros, ferraduras, podomorfas e outras. Outros símbolos gravados como as cruces, invadindo ou compartindo espazo cos anteriores, pertencerían xa ao alto ou baixo Medievo e en ocasións terían unha clara intención de cristianización deses espazos ou mesmo de sinalización delimitadora de territorios.

Os petróglifos atópanse nun penedo ao carón dun cruce da estrada a Lamaforcada (o microtopónimo do lugar é “Penedo do Lagarto”), e foi un dos primeiros catalogados no concello.

Este conxunto, tamén coñecido como Petroglifos de Penedo Laxa, está formado por diversos círculos concéntricos con dous, tres e catro aneis e unha cazoleta central, coviñas ou cazoletas e liñas que forman figuras singulares. Na parte superior atópanse a maioría dos motivos, tamén hai cazoletas nunha laxa máis baixa e nunha aira situada a escasos metros.